Gabay sa mga Manunulat
The Upper Room Daily Devotional Guide
Bago magpasa ng pagbubulay, basahin muna ang mga gabay na ito para malaman kung anong hinahanap namin sa mga kuwentong pina-publish namin.
Ang Upper Room ay ginawa para sa mga tao mula sa ibat-ibang bansa at denominasyon ng simbahan. Gusto naming matulungan ang mga Kristiyano sa personal nilang pananalangin at pamumuhay bilang alagad ni Cristo. Gusto naming bigyang halaga kung ano ang nagbubuklod sa atin at gusto naming pag-ugnayin ang mga Kristiyano sa buong mundo sa pananalangin.
Ang mga pagbubulay sa bawat araw ay sinulat ng mga taong kagaya niyo, mga taong nakikinig sa Diyos at nagsisikap na isabuhay ang narinig nila. Ang Upper Room ay isang komunidad ng mga Kristiyanong nagbabahagi ng pananampalataya sa isat-isa.
Milyon-milyong tao ang nagbabasa nito araw-araw. Ang Upper Room ay isinasalin sa lampas 30 na wika at nakakaabot sa higit 100 bansa.
Saan ako magsisimula?
Magsimula ka sa personal mong relasyon sa Diyos. Naniniwala ang mga Kristiyano na kinakausap at ginagabayan tayo ng Diyos tuwing nagbabasa tayo ng Biblia at nagdadasal. Ang magagandang pagbubulay ay nakabase sa sinasabi sa Biblia at nagpapakita kung paano nakatulong ang salita ng Diyos sa isang sitwasyon. Ginagawa nitong buhay ang mensahe mula sa Biblia.
Una sa lahat, ang magandang pagbubulay ay totoo. Pinapakita nito ang koneksyon ng mga totoong nangyayari sa pang-araw-araw na buhay at ng pagkilos ng Diyos.
Pangalawa, ang magandang pagbubulay ay may mga detalyeng nakikita, naririnig, naamoy, o nararamdaman. Mukhang karaniwan lang, pero makakatulong ang mga ganitong detalye para mas makakonek sa kwento ang mga magbabasa nito.
Huli, ang magandang pagbubulay ay nanghihikayat ng pagmumuni-muni, pero hindi tunog nagsesermon. Nagsasaliksik ito, nagtatanong, at naghahanap ng sagot. Sinusuri nito ang pananampalataya at hindi pinapangunahan ang mga maaaring sagot dito.
Paano ko sisimulan ang pagsusulat ko ng pagbubulay?
Makakakuha ka ng magandang ideya mula sa pagbabasa ng Biblia at paghahanap ng koneksyon nito sa pang-araw-araw na buhay. Pag may nakita kang magandang koneksyon, sundan ang ilang hakbang na ito para maisulat ang mga iniisip mo:
Isulat sa sariling salita ang turo sa Biblia o ang buod ng mga talata.
Ilarawan ang sitwasyon na naiugnay mo sa mga talatang napili. Magbigay ng mga konkretong detalye na kaya mong isulat tungkol sa karanasan mo.
Sabihin kung paano mo isasabuhay ang mga turong ito sa mga susunod na pagkakataon. Paano ito magagamit ng iba sa buhay nila? Ano ang gusto mong gawin ng taong babasa pagkatapos niyang basahin ang sinulat mong pagbubulay?
Paglipas ng ilang araw, basahin ulit ang sinulat mo. Piliin ang mga detalyeng pinakanaglalaman ng mensaheng gusto mong iparating, tapos burahin mo na yung iba. Hindi dapat lumampas sa 300 na salita ang ipapasa mo. Ngayon, pwede mo nang ipasa yan para mapagpilian ng Upper Room.
Ilang tips na dapat isaalang-alang
Mas malakas ang impact ng pagbubulay kapag meron itong personal na kwento, may koneksyon sa mga talata sa Biblia, at may direktang paraan para maisabuhay ito ng babasa.
Mag-focus lang sa isang punto. Isipin na isa itong larawan, hindi pelikula.
Sikaping hikayatin ang mga babasa na mas pag-aralan pa ang Biblia at mas kilalanin ang Diyos.
Laging ibigay ang pinagkuhaan mo ng ng mga materyal na babanggitin o ng bahagi ng kasaysayan na ikukwento mo. Hindi pipiliin ang istorya mo kung meron itong mga kataga galing sa mga source na hindi siguradong tama. Hindi rin kami pumipili ng pagbubulay na merong tula, lyrics ng kanta, o mga kataga, na kailangan pang hingan ng permiso sa ibang publisher bago magamit.
Hindi pwedeng magpasa ng dati nang nai-publish na pagbubulay.
Hanggang 300 na salita lang ang papayagan.
Isulat ang pangalan at contact information sa bawat pahinang ipapasa.
Kelan ang deadline?
Tuloy-tuloy ang pangangailangan namin ng materyal, kaya pwedeng magpasa ng pagbubulay kahit kelan. Pero para mai-print ito nang sabay-sabay sa ibat-ibang parte ng mundo, maaga naming tinatrabaho ang mga ito. Madalas kakaunti ang natatanggap naming pagbubulay na nakatuon sa mga selebrasyon sa simbahan (Pasko ng Muling Pagkabuhay, Kuwaresma, Pasko, atbp.)
Ang Tugon namin sa iyong Pinasa
Binibili namin ang karapatan na isalin ang mga pagbubulay na ginagamit sa mga edisyon sa buong mundo, kasama ang mga electronic at software-driven format, at pwede rin itong isama sa koleksyon na ipi-print ng Upper Room balang-araw. Nagbabayad kami ng $30.00 para sa bawat pagbubulay na isasama sa bawat isyu. Bibigyan din namin kayo ng apat na kopya ng isyu kung saan lumabas ang sinulat nyo (pero dapat mafill-up at maibalik nyo sa amin yung mga forms na ipapadala namin sa inyo).
Hindi kami makakapagbigay ng status o ng komento sa ipinasa niyong pagbubulay. Lahat ng ipi-print na pagbubulay ay ine-edit namin.
Siguraduhing isulat ang iyong contact information (email and home address) sa bawat ipapasang pagbubulay, dahil padadalhan namin kayo ng form na pipirmahan niyo kung sakaling mapili ang sinulat niyo para i-print.
Hindi namin maibabalik ang pagbubulay na pinasa niyo, kaya makakabuting magtago ng sariling kopya. Hanggang tatlong pagbubulay lang ang ipasa tuwing magpapadala.
Aasahan namin ang pagbubulay na ipapasa nyo at sana ay magamit ito sa mga susunod na isyu ng Upper Room.
Saan ko ipapadala ang isusulat kong pagbubulay?
POSTAL MAIL
Editorial Office
THE UPPER ROOM Magazine
1908 Grand Avenue
Nashville, TN 37212